Beranda > BAM > Maunjuakan Minum Jo Makan

Maunjuakan Minum Jo Makan

MAUNJUAKAN MINUM JO MAKANAN

Disusun Oleh : H. Awalalul Karimi, S.Pd, Dt. Sinaro Kayo

Guru BAM SMPN 1 Kec. Akabiluru

Maa lah datuak (ambo tuak ) Sungguapun datuak surang nan ta imbau, taga dek imbau nan sakali,

di layia nyatolah tasabuik,  di bathin samo dipahamkan,  ambo mandatangkan sombah,  adapun sombah nan ka-ditunggangkan kapado datuak,

rumah gadang sangkutan undang,  tiang panjang tampek pusako, paparan sapanjang buek,

bincangan sapanjang adat, nyatolah adat kito pakai, mano lah tandonyo adat kito pakai, kok jauah surek talayang,

nan ampiang kulensiang tibo, dipakai panggia mamanggia, lah tibo datuak nan basamo, ala dek duduak datuak, taselo bulek,  tasimpuah kotak, di tangah medan majilih nan rapek ko, Iyo dek siriah nan bagagang,

nyato dek pinang nan batanti,  Lah nyato adat nan mandatang, iyo limbago nan ma nanti, tandonyo kami mamakai adat, siriah sacabiak lah datuak kunyah, pinang sadidih lah datuak gotok, ala salamaik samparono,

Limbak nan dari pado itu, pihak diminum jo makanan, nan lah tibo di hadapan datuak,  tampak baririk diruang  tangah,  tampak basusun diruang tapi, ala salamaik samparono, Tapi samantang pun bak itu,

amat dek manti jo pagawai,  pihak diminum jo makanan,  kok basuo lilik jo sumbiang,  kok batamu panjang jo singkek, ampun jo maaf kami mintak, kapado datuak nan basamo.

Limbak nan dari pado itu, pihak diminum jo makanan, nan bak santano urang manabang, nan ditabang pun ala rabah, nan dek ukua makanan kabuang, tiok barih makanan paek, nan baukua kabuang lah dek datuak, nan babarih nak ba paek pulo, itunyo sombah salam dari kami, nan lah tibo di hadapan datuak, diharap bunyi nak kumbali,

sakian sajo pasombahan.

W A L A K

Lah sampai dek datuak ( sampai ) Nan sapanjang kato datuak tu, iyolah kato nan sabanayo, tapi samantang pun baitu, ditiliak langgaman adat, ditimbang aluran cupak, cupak boyan gantang tadiri, suri tagantuang nan ba uleh,

kota nan datang dari datuak, nak kami paukua pa jangkokan, nak kami paiyo pa tidokan,

sopaik mananti malah datuak,

sakian sajo kasaponyo.

JAWAB MAUNJUAKAN MINUM JO MAKANAN

Maa  lah datuak  ( ambo tuak ) Adapun tawalak kato datuak, dimbiak bulek sakato, dilatak dalam mufakaik, dipakai basamo-samo, taga dek malim sa agamo, nan dek pangulu sa andiko, lah  tapakai lengah jo lambek, ampun jo maaf kami mintak, kapado datuak nan basomo, nan sapanjang koto datuak tadi,

iyolah kato nan sabananyo,  nan bak santano urang manjaik,  jajak nan indak kaditikam, kilin nan indak ka diulang, ditikam jajak kok cupu, diulang kilin kok lapeh, ditiru kok tok sarupo, di ireh kok tak saroman, ambo ma ambiak awa pangabisan, kota nan datang dari datuak,

nan kajadi awa pangabisan, kato nan dari datuak tadi, pihak diminum dan makanan, nan lah tibo di hadapan datuak, tampak baririk di ruang tangah, nyato basusun di ruang tapi, ala salamaik samparono.

tapi samantang pun baitu, pihak diminum jo makanan, kok basuo lilik jo sumbiang, kok batamu panjang jo singkek, ampun jo maaf kami mintak, kapado datuak nan basomo,

Limbak nan dari pado itu, pihak diminum jo makanan, nan bak santano urang manabang, nan ditabangpun ala rabah, nan ba ukua makanan kabuang, tiok barih makanan paek, nan baukua  kabuang lah dek datuak, nan babarih iyo nak ba baek pulo, kan baitu bona kato datuak.    ( bana baitu )

Indak  lai tuak, nan sapanjang kato datuak tadi, nan kajadi sawuik jo saponyo,             pihak diminum jo makanan, kami terimo elok-elok, kito pakaian basamo-samo.

Tapi samantang kok baitu,

Pandai Sikek jo  Sungai Buluah, nan salirik jalan ka Padang, Sadangkan barundiang kami lai namuah,

apolai mamakan nan tahedang.

Ilia kan jalan dari Situjuah, basimpang tigo di Limbukan ka kida jalan Tanjuang Bungo, Sungguahpun kami datuak suruah, mulai dek datuak dari sanan, nak ma-iriang kami nan basamo, Sakian sajo kasaponyo.

  1. 15 Desember 2010 pukul 10:57 PM

    Assallamu’alaikum.. mohon bantuannya pak.. tolong dikirimkan perangkat KBM Mulok BAM ke email saya kls 7 8 dan 9.yaitu silabus – rpp dan selengkapnya. sebelumnya saya ucapkan terimakasih.

    Guru BAM MTs Muhammadiyah Cupak-solok

    • 19 Desember 2010 pukul 12:52 AM

      Inysa Allah, akhir tahun ini kami kirimkan.

  1. No trackbacks yet.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: